ქედის მუნიციპალიტეტში მიმდინარე სამუშაოების შესახებ მოსახლეობასთან საინფორმაციო შეხვედრა გაიმართა

ქედის მუნიციპალიტეტში თანამედროვე წყალმომარაგებისა და წყალარინების ინფრასტრუქტურა შენდება.

მიმდინარე და დაგეგმილი სარეაბილიტაციო სამუშაოების შესახებ მოსახლეობისთვის ინფორმაციის გაცნობის მიზნით, დაბა ქედაში და სოფელ ვაიოში, სამუშაო შეხვედრები გაიმართა.

სამუშაოები უკვე დაწყებულია დაბა ქედაში, ვაიოში, უჩხითში, აქუცაში, მილისში, ქოსოფელსა და ტიბეთაში.

მასშტაბური ინფრასტრუქტურული პროექტი წყალმომარაგების სათავე ნაგებობების, მაგისტრალური მილსადენების, რეზერვუარების, წყალარინების გამწმენდი ნაგებობების და წყალარინების ქსელების მშენებლობას ითვალისწინებს.

პროექტის ფარგლებში ასევე ლაბორატორიები და წყლის მომსახურების მუნიციპალური საწარმოების ადმინისტრაციული შენობები აშენდება.