ხელვაჩაურის სოფლებში შარაბიძეები, ზანაქიძეები, ხელვაჩაური და მახვილაური წყალმომარაგებისა და წყალარინების ინფრასტრუქტურა მოეწყობა

აჭარის დაბებისა და სოფლების წყალმომარაგებისა და წყალარინების პროექტის ფარგლებში, დღეისათვის, სამუშაოები აჭარის სხვადასხვა მუნიციპალიტეტში ერთდროულად ხორციელდება.

ხელვაჩაურის მუნიციპალიტეტში კომუნალური ინფრასტრუქტურის მოწყობა რამდენიმე სოფელში უკვე მიმდინარეობს. პროექტი დამატებით რამდენიმე სოფელში, კერძოდ, შარაბიძეებში, ზანაქიძეებში, ხელვაჩაურსა და მახვილაურში განხორციელდება.

კომუნალური ინფრასტრუქტურის მოწყობის მიზნით საპროექტო-საინჟინრო დოკუმენტაციის მომზადება უკვე დაწყებულია.

საპროექტო ტერიტორიას აჭარის ფინანსთა და ეკონომიკის მინისტრის მოადგილე არჩილ სირაბიძე, ხელვაჩაურის მუნიციპალიტეტის მერის მოადგილესთან, აჭარის წყლის ალიანსის წარმომადგენლებთან და ექსპერტებთან ერთად გაეცნო.

აჭარის დაბებისა და სოფლების წყალმომარაგებისა და წყალარინების პროგრამის დასრულების შემდეგ, აჭარის 39 სოფელი და დაბები 24 საათიანი უწყვეტი წყალმომარაგებით და გამართული წყალარინების სისტემებით ისარგებლებს. პროექტი KFW ბანკის, ევროკავშირის და საქართველოს მთავრობის ერთობლივი თანამშრომლობით ხორციელდება.