ესეების კონკურსი მოსწავლეებისთვის - „წყალი მშვიდობისთვის“

სს „აჭარის წყლის ალიანსი“ 22 მარტს წყლის საერთაშორისო დღესთან დაკავშირებით, აცხადებს ესეების კონკურსს - „წყალი მშვიდობისთვის“.

ესეების კონკურსში მონაწილეობის მიღება შეუძლიათ აჭარის დაბებისა და სოფლების წყალმომარაგებისა და წყალარინების პროგრამის ფარგლებში ჩამოყალიბებული ეკოკლუბების სკოლების მოსწავლეებს, VII-XII კლასების ჩათვლით. (იხილეთ სკოლების დეტალური ჩამონათვალი ქვემოთ).

წყლის საერთაშორისო დღე, გაეროს გაერთიანებული ერების ორგანიზაციის მიერ, ყოველწლიურად 22 მარტს, 1993 წლიდან აღინიშნება. ამ დღის მიზანია მოსახლეობაში გაიზარდოს ცნობიერება უსაფრთხო სასმელ წყალთან წვდომის შესახებ, რადგან გაეროს მონაცემების თანახმად მსოფლიოში 2.2 მილიარდ ადამიანს უსაფრთხო სასმელ წყალთან წვდომა არ აქვს. გაეროს გადაწყვეტილებით, წყლის საერთაშორისო დღის ფარგლებში ყოველწლიურად სხვადასხვა კამპანიები ტარდება. 2024 წლის კამპანიაა - „წყალი მშვიდობისთვის“.

სს „აჭარის წყლის ალიანსის“ მიერ გამოცხადებული ესეების კონკურსის მიზანია მოსწავლეებში ამაღლდეს ცნობიერება წყლის რესურსების უსაფრთხოდ, სტანდარტების შესაბამისად მართვის და მასზე მოსახლეობის თანაბარი წვდომის უზრუნველყოფის შესახებ. შეფასების და ანალიზის უნარის გამომუშავება, თუ რისი გაკეთება შეუძლია თითოეულ მოქალაქეს წყლის რესურსების შენარჩუნების და დაცვის მიზნით.

საკონკურსო პირობები:

• ესეების კონკურსში მონაწილეობის მიღება შეუძლია აჭარის დაბებისა და სოფლების წყალმომარაგებისა და წყალარინების პროგრამის ფარგლებში ჩამოყალიბებული ეკოკლუბების სკოლების მოსწავლეებს. იხილეთ ინფორმაცია მუნიპალიტეტების მიხედვით:
  ხულოს მუნიციპალიტეტი: დაბა ხულოს საჯარო სკოლა, დიოკნისის საჯარო სკოლა, რუსლან მელაძის სახელობის ქვემო ვაშლოვანის საჯარო სკოლა, ოქრუაშვილების საჯარო სკოლა, ძირკვაძეების საჯარო სკოლა, ძმაგულას საჯარო სკოლა, განახლების საჯარო სკოლა; 
  შუახევის მუნიციპალიტეტი: დაბა შუახევის საჯარო სკოლა, გომარდულის საჯარო სკოლა, წყაროთას საჯარო სკოლა, ჭალის საჯარო სკოლა, ამირან მამალაძის სახელობის ბარათაულის საჯარო სკოლა, ბრილის საჯარო სკოლა; 
  ქედის მუნიციპალიტეტი: ვახტანგ პაპუნიძის სახელობის დაბა ქედის საჯარო სკოლა, ვაიოს საჯარო სკოლა, უჩხითის საჯარო სკოლა; 
  ხელვაჩურის მუნიციპალიტეტი: კირნათის საჯარო სკოლა; 
  ქობულეთის მუნიციპალიტეტი: ქვედა კვირიკეს საჯარო სკოლა, მუხაესტატეს საჯარო სკოლა, გიორგი შაინიძის სახელობის დაბა ოჩხამურის საჯარო სკოლა,
  ცეცხლაურის N1 საჯარო სკოლა, ცეცხლაურის N2 საჯარო სკოლა, ომარ ასლანიძის სახელობის ჯიხანჯურის საჯარო სკოლა;
• ესე შესრულებული უნდა იყოს ქართულ ენაზე. ნაშრომის მოცულობა არ უნდა აღემატებოდეს 600 სიტყვას. ესე უნდა გამოაგზავნოთ MS Word-ის ფორმატში,
  გამოიყენეთ შრიფტი: Sylfaen, შრიფტის ზომა: 12;
• ნაშრომის ბოლოს მიუთითეთ ავტორის სახელი, გვარი, სკოლის და მუნიციპალიტეტის დასახელება. ასევე, მოსწავლის, ან მშობლის და სკოლის მასწავლებლის საკონტაქტო მობილური ტელეფონის ნომრები;
• ესეების მიღების პერიოდია: 19 თებერვლიდან, 14 მარტის 18:00 საათამდე. დაგვიანებით მიღებული ესე არ განიხილება;
• ესეები გამოაგზავნეთ მეილზე: ajarawateralliance@gmail.com
• თითოეული გამოგზავნილი ესე, 15 მარტს განთავსდება ვებგვერდზე და ყველას შეეძლება გაცნობა;
• სს „აჭარის წყლის ალიანსი“, საერთაშორისო კონსულტანტების დახმარებით დაკომპლექტებული კომისიის წევრების მეშვეობით, გამოავლენს 3 საუკეთესო ნაშრომს (I, II, III ადგილები);
• ინფორმაცია ესეების კონკურსში გამარჯვებულების შესახებ, განთავსდება სს „აჭარის წყლის ალიანსის“ ვებგვერდზე და სოციალურ გვერდებზე 22 მარტს, წყლის
  საერთაშორისო დღეს;
• გამარჯვებული 3 მოსწავლე დაჯილდოვდება დიპლომებით და ჯილდოებით. I ადგილზე გასულ მოსწავლეს 300 ლარის, II ადგილზე გასულ მოსწავლეს 200 ლარის და III ადგილზე გასულ მოსწავლეს 100 ლარის ოდენობის წიგნის მაღაზიის ვაუჩერები გადაეცემა;

ნაშრომების შეფასების კრიტერიუმებია:

• ტექნიკური დეტალების გათვალისწინება (ფონტი, შრიფტი, სიტყვების რაოდენობა);
• ესეს საკონკურსო თემატიკასთან შესაბამისობა;
• ენობრივი გამართულობა;
• მოსაზრების, ან საკითხის არგუმენტებით და მაგალითებით გამყარება;
• სტრუქტურული გამართულობა (შესავალი, ძირითადი ნაწილი და დასკვნითი ნაწილი);

წყლის საერთაშორისო დღესთან და კამპანიასთან დაკავშირებით, დამატებით საკითხავ მასალას შეგიძლიათ გაეცნოთ ბმულზე: https://shorturl.at/jlwG6